這個就係出島既碼頭啦!
Jason 就先同我地去Watersport Centre 租兩套浮潛用具，我自己就用私家o既!
Jason 再去這邊幫我地買船票和BBQ餐的票!
我地就係坐這種快艇出沙比島o架啦!
坐快艇短片~
到左沙比島碼頭拍o既!
碼頭上有個牌，有齊這個島會出現既魚。
個碼頭用木做都幾穩陣，而且伸到好出，將沙比既沙灘一份為二。
行過好長既沙比島入口處，Jason 幫我地比左每人RM$10.0作為上島費用。就安排我地坐係張好似擺酒咁既檯，仲有一把好大o既大陽傘。我地3個人放低左d野就換泳衣，換完泳衣就有島上既旅行社介照各種水上活動，其中有飛魚、水上電單車、香蕉船...........，我地只係玩左飛魚和水上電單車。
沙比島碼頭入口
沙比島地圖
島上小商店，我就係在這裡買好有名o既果汁雪條(大樹波蘿味)!
這裡是沙比右邊o既沙灘，而右邊沙灘比較多魚，左邊比較少!
呢隻就係我玩緊o既飛魚(Fly Fish)，相中遠處果個就係我黎o既。
第一個活動當然係飛魚啦! 點玩o架? 講都唔會明架啦! 去片啦!
玩完番黎就去玩水上電單車，先要載我地出去近Magellan 既一個浮台等電單車玩，，等左好耐先輪到我玩，今次雖然貴d，但時間夠長，而且話就話有範圍，但去到好遠都冇人理我地，自己踩到架電單車盡晒，架車跳到差d飛左我落海，手累得好緊要，好鬼爽，過足癮。
最後玩到我自己都累到頂唔順先駛埋d，佢先叫我番去，我就即刻番去啦! 再唔番去我怕冇力拉個油門制。
浮台留影~
咁玩完就有快艇來接我地啦，咁就上船番去，咁Q有個職員唔知係邊捉左條水蛇黎玩，都係果句"沒圖沒真相" !
果個人玩左一陣就係船尾掉番落海!
好快就番到去沙比島啦! 時間大約係12:20，這個時候剛好到左食午飯時間，我地既燒烤餐呀!
玩完咁多用體力既活動，真係好鬼累，我見到碟飯就好鬼肚餓，咁我就以一向出名既奇招 "餓狗搶X!" 去食這餐飯，其實就唔趕，不過肚餓加心急去玩餵魚，就嘜都唔理啦!
咁食完都一點啦，仲有半個鐘就要坐船去馬干奴島，咁就去餵下魚，真係好鬼多魚，一放麵包就有超過50條魚游埋黎搶食，都係果句，去片!
這裡就是餵魚果邊o既海灘!
同一個海灘近碼頭處
係海面影o既天空，都算幾好天!
餵到13:30，就上船去馬干奴島，之前有幾位網友提過果到好靚o架! 坐左5分鐘就到啦!
馬干奴島碼頭入口
島上酒店
去到馬干奴島差不多14:00，但天開始陰，有d想落雨，但仲未會落，咁唔理啦! 即時落水先再算，但落到水就知唔多對路，水好濁唔見有魚，但係就滿地海參，咁我地再放麵包，答案係"冇魚食!"
唯有再行遠少少啦! 但係行遠d去浮潛，都係好少魚，只有幾條比較大既魚，好難先餵到佢地食。餵多兩下都唔理我地，去片!
唉! 只有放棄。咁就15:00，我地慢條斯理咁去仲身換衫啦，沿路睇下島上既餐廳和酒店，設備都幾齊全，餐廳仲幾有氣氛添。
這個島有一項活動係三個島中得佢有，就係海底電單車啦! 我都冇玩，唔知點情況，你地自己去試下啦!
這張係海底電單車既橫額啦!
我地就坐船番去市區啦! 係途中見到難得睇到既神山山頂，此山被譽為東南亞第一高峰。
由於大家都肚餓，咁就去食個Tea先，咁都係食d簡單野，但甜品就有一樣叫做 A.B.C. 既刨冰，真係好好食，初初我就叫左一碗，其他人食左幾嗒之後就話要叫多碗啦!
這碗就係價值 RM$3.00 好好食o既A.B.C.!
大家食完都話好! 人人都比手指公!
這杯就係馬來西亞好出名o既拉茶!
餐廳招牌，如你有裝 iExif 就可以睇到佢o既位置啦!
大家食飽飽就要進行一個地獄式o既行程，這個行程來到沙巴後都係第一次，就係讓同行兩位女士去血拼，衝呀! Shopping 呀! 附近有個商場都幾大，咁Q 有Nike Shop 做特價，之後再戰百貨公司，咁當然買左唔少野，好彩有 Jason o架車，我地可以放低d野先再下一個行程。
血拼到入黑，兩位女士終於停手，我地就番去o架車放低d戰利品，去停車場旁類似食街咁既地方，咁我地選左第一檔o既金寶食海鮮，不過整體來講都係海王城好食少少。
食街入口招牌
我地第二晚食海鮮既地方
幾好飲o既青檸話梅冰!
馬拉盞炒沙巴薯仔菜，超好味!~
奶油老虎蝦幾好味，但奶油味偏淡，都係海王城好食d!~
蒜蓉蒸扇貝
我地一坐落，就有其他檔口o既人埋黎 sell 燒雞翼同餃子，而我地再去叫蠔餅食，味道都唔差。
餃子~
蠔餅
食到半路，就有場馬來西亞o既民族舞表演。
食完飯，Jason 就提議去睇下夜景，咁轉幾個圈後就到左半山上一個公園，撞正個公園又冇晒電，連燈都冇開，咁睇沙巴夜景都唔錯o架。
之後就番酒店休息，但此時心有不甘，因為今日下午去馬干奴島冇魚餵，而第四天又未有行程，再去沙比島好唔好呢! 都係決定唔到，聽朝先算!
下面係今日的相片及行程圖:
在較大的地圖上查看2007-10-15 馬來四亞 沙巴
