2008年4月 - 日本京阪神旅遊前花絮

2008年日本京阪神旅遊前花絮 !

話說在二月尾三月頭已經估計四月頭工作會比較靜，所以開始計劃去旅行，初時以平價短程為目的地去選擇，當中又以海南島為首選，但唔知點解，最後獅子大王大人話撞正日本櫻花開花期，咁好啦，係大人要求下，即時升級至貴價中程0既地方 - 日本。

話說上次去日本係跟新華超平價7天團(新華包機坐港龍，一次過出四團合共過百人，四架車一齊行)，北海道入~東京走，有三晚溫泉酒店，又有雪車玩，又有新鮮好味既海膽食，都幾好玩同滿意，咁心裡都係先去新華問下先，點知三月頭話未有四月頭o既日本團的資料，完全冇得問。

咁冇計唯有去永安問左先，不過都係好少京阪團，咁就再去好多人話好o既東X遊問，好少少，京阪團都有溫泉酒店，係咁情形下二選一，咁我都想左一兩日，就去東X遊報名，試下係咪人地講得咁好啦! 原本想報4月2日既京阪團，點知話滿晒，咁只有改為4月3日出發，比左訂之餘，仲比晒3晚stay behind 既費用，兩日後就cfm 酒店，但團仲未cfm， 咁佢地就好精咁同我地講"團仲未成行"，都心知不妙，但上左賊船都冇計，只有等消息。

就咁過左約十多天，直到出發前約7日，就收到東X遊通知，個團唔成團。真係有冇搞錯，4月3日係京阪櫻花滿開既頭一兩日，仲係假期第一日出發，邊有可能唔夠人數，只會冇機票或酒店，一個月前都開始爆團，亦冇理由未book。而東X遊就叫我轉去佢地搞既包機團，廣島入~大阪走，仲要冇得 stay behind，擺到明係有團唔開，谷人去包機團，今次見識到佢0既賤招，咁我即時叫獅子大王大人去永安問下有冇團，剛剛好欠2 人就有團成團，這團就係之前二選一既另一轉啦。

我地即時決定報名(3個人)，即時交全數成行，仲即時book stay behind 既酒店，咁先去到日本。

而我經過今次，我講過以後唔會再跟東X遊去旅行，亦一定叫朋友唔好去報名。

後記，旅行團最後一日，幾 Group 團友講開才知道，竟然發現原本大家都係東X遊的同一團同一日既團友，不過大家都係不值該公司賤招，而轉去永安報名，大家又做番團友。